Pa’ataj wa pa’ajuum / Romper el sonido (primer segmento)

U pa’atajil* noj k’iin

1

Ba’ax ku pa’atik j maya wíinik:

wa buuts’ta’ab u yiijil u t’aan,

tootkinta’ab u no’ojil u tsolxikin

ko’okotsa’ab u túulisil u tsikbal

yéetele’ móochkinta’ab u t’a’ajil u tuukul.

Ba’ax ku pa’atik j maya paak’al:

wa xkáakbachkuunta’ab u puksi’ik’al u yi’inaj

ch’éejsa’ab u noj k’áax

pu’ujsa’ab u cháakil u paak’al

yéetele’ bola’ab u ni’ u xuul.

Ba’ax ku pa’atik j maya meen:

wa k’áasta’ab u kili’ich payalchi’,

kona’ab u muuk’ yuum iik’,

káalkunta’ab u yuk’lil báalche’,

yéetele’ sa’ap’sa’ab u sujuy ja’il u meyaj.

Ba’ax ku pa’atik j maya ts’oon:

wa alabta’ab u kéejil u k’áax,

maka’ab u jool u yáaktun jaaleb,

tóoka’ab u ja’il u ts’aats’il yotoch kitam

yéetele’ wuts’a’ab u mu’uk’a’anil u tojil u ts’oon.

J Maya wíinike’ táan pa’ataj yaan tumen:

jats’uts u líik’il u paak’al xsutut,

k’a’am yu’ubik u kilim yuum cháak,

chechejkil tu joma’ u yi’inaj ts’o’ok tak yilik tu lu’umil u báaxal kéej.

Quebrar el sonido para la fiesta

1

¿Por qué el hombre maya rompió el sonido,

si ahumaron su palabra,

enmudecieron su pensamiento,

despedazaron su historia,

y mutilaron su testimonio?

¿Por qué el sembrador maya rompió el sonido,

si adulteraron el corazón de su semilla,

talaron su monte,

desterraron la lluvia de su siembra,

y abollaron su sembrador?

¿Por qué el aj meen maya rompió el sonido:

si cercaron su alegre plegaria,

vendieron el vigor del viento,

embriagaron su báalche’,

y secaron su agua sagrada?

¿Por qué el cazador maya rompió el sonido:

si colonizaron su venado selvático,

taparon la casa del tepezcuintle,

quemaron la aguada del jabalí,

y torcieron su diestra puntería?

El hombre maya rompe el sonido porque:

la planta de sutut va creciendo,

escucha el estruendo de la lluvia,

su semilla apresura al sembrador

y celebra la danza rebelde del venado.